Төлөөлөн удирдах зөвлөлийн бүрэн эрхийн тухай

Энэ удаагийн мэдээгээр компанийн төлөөлөн удирдах зөвлөлийн бүрэн эрхийн талаар танилцуулахаар бэлтгэлээ.

Хуульд заасны дагуу хувьцаат компани нь заавал төлөөлөн удирдах зөвлөлтэй байна. Харин хязгаарлагдмал хариуцлагатай компанийн /ХХК/ хувьд төлөөлөн удирдах зөвлөлгүй байж болохоор зохицуулсан.[1] Гэвч банк, санхүү, даатгал, үнэт цаас, тусгай зөвшөөрлийн үндсэн дээр үйл ажиллагаа явуулдаг хязгаарлагдмал хариуцлагатай компанийн хувьд заавал төлөөлөн удирдах зөвлөлтэй байх бөгөөд төлөөлөн удирдах зөвлөлийн эрх, үүргийг салбар хуулиар нарийвчилж тогтоосон байна.

Төлөөлөн удирдах зөвлөлийн гишүүний бүрэн эрхийн хугацааг компани өөрөө дүрмээр тогтоодог. [2] Хэрэв дүрэмд заагаагүй бол гишүүний бүрэн эрхийн хугацаа дараа жилийн хувьцаа эзэмшигчдийн ээлжит хурал хуралдах өдрөөр дуусгавар болох бөгөөд улируулан сонгож болно. [3]

Төлөөлөн удирдах зөвлөл нь дараах бүрэн эрхтэй. Үүнд: [4]

1.  Компанийн үйл ажиллагааны үндсэн чиглэлийг тогтоох;

2. Хувьцаа эзэмшигчдийн ээлжит болон ээлжит бус хурлыг зарлан хуралдуулах. Хувьцаа эзэмшигчдийн хурлын чөлөөт цагт компанийн эрх барих байгууллага нь Төлөөлөн удирдах зөвлөл бөгөөд хурлыг сард 1 удаа хуралдана. Хэрэв шаардлагатай гэж үзвэл нэмэлтээр /ээлжит бус/ хуралдаан зохион байгуулж болно; [5]

3. Хувьцаа эзэмшигчдийн хурлаар хэлэлцэх асуудал, саналын эрхтэй хувьцаа эзэмшигчдийн нэрсийн жагсаалтыг гаргах бүртгэлийн өдөр болон хувьцаа эзэмшигчдийн хурлыг хуралдуулахтай холбогдох бусад асуудлыг шийдвэрлэх;

4.  Компанийн зарласан хувьцааны төрөл болон тоонд багтаан хувьцаа гаргах; [6]

5.  Компанийн дүрэмд заасан хувьцаанд хамаарах болон бусад үнэт цаас гаргах;

6.Компанийн эд хөрөнгийн болон эд хөрөнгийн эрхийн зах зээлийн үнийг тогтоох;

7. Өөрийн гаргасан хувьцаа, бусад үнэт цаасыг худалдан авах буюу эргүүлэн авах;

8. Компанийн гүйцэтгэх захирлыг сонгон шалгаруулах, чиглүүлэх, түүний үйл ажиллагаанд хяналт тавих болон үүрэгт ажлаас нь чөлөөлөх;

9. Компанийн гүйцэтгэх удирдлагатай байгуулах гэрээний нөхцөл, түүнд олгох шагнал, урамшуулал, хариуцлагын хэмжээг тогтоох;

10. Аудитын байгууллагыг сонгож, түүнтэй байгуулах гэрээний нөхцлийг тогтоох;

11. Компанийн жилийн үйл ажиллагааны болон санхүүгийн тайлангийн талаар дүгнэлт гаргаж, түүнийг хувьцаа эзэмшигчдийн хуралд танилцуулж батлах;

12. Компанийн дүрэмд өөрөөр заагаагүй бол ногдол ашгийн хэмжээ, түүнийг төлөх журмыг тодорхойлдог бөгөөд ногдол ашиг хуваарилалтын тайланг хувьцаа эзэмшигчдийн дараагийн хуралд тайлагнах; [7]

13. Төлөөлөн удирдах зөвлөл, гүйцэтгэх удирдлагын үйл ажиллагааны болон компанийн засаглалын дотоод журмыг батлах;

14.  Компанийн салбар болон төлөөлөгчийн газар байгуулах;

15. Компанийг өөрчлөн байгуулах талаар хувьцаа эзэмшигчдийн хурлын шийдвэрийн төслийг бэлтгэх, гаргасан шийдвэрийг хэрэгжүүлэх;

16.  Их хэмжээний болон сонирхлын зөрчилтэй хэлцэл хийх зөвшөөрөл олгох;

17. Компанийг нэгтгэх, хуваах, тусгаарлах, өөрчлөх, татан буулгах талаар шийдвэр гаргах болон компанийн дүрмээр тогтоосон бусад асуудлыг хэлэлцэн шийдвэрлэх бүрэн эрхтэй.

Дүгнэвэл, төлөөлөн удирдах зөвлөл бол компанийн бодлого, стратегийг тодорхойлж, түүний хэрэгжилтэд хяналт тавьдаг чухал байгууллага бөгөөд компанийн засаглалын ил тод байдал, хариуцлага, тогтвортой хөгжлийн үндэс болдог. Иймд төлөөлөн удирдах зөвлөл бүтэц, бүрэн эрхийг ойлгох нь хувьцаа эзэмшигч, удирдлага болон олон нийтэд компанийн үйл ажиллагааны ил тод байдлыг хангах чухал ач холбогдолтой юм.

Эх сурвалж:

[1] Компани тухай хуулийн 75.1

[2] Компани тухай хуулийн 78.1

[3] Компани тухай хуулийн 75.3

[4] Компани тухай хуулийн 76 дугаар зүйл

[5] Компани тухай хуулийн 80.1

[6] Компани тухай хуулийн 87.1

Анхааруулга: Энэхүү хууль зүйн мэдээ, нийтлэлийг тухайн үед хүчин төгөлдөр мөрдөгдөж буй хууль тогтоомжийн хүрээнд, зөвхөн ерөнхий мэдээлэл өгөх зорилгоор боловсруулсан тул хууль зүйн тухайлсан зөвлөгөөг өмгөөлөгчөөс авна уу.